ތިނަދޫ ރައްޔިތުންގެ އަޑު ވަނީ ރައްޔިތުންގެ މަޖލިސް ތެރެއިން ކަނޑުވައިލެވިފައި ކަމަށް، އިލެކްޝަން ކޮމިޝަނުން ގޮނޑި ގެއްލިފައިވާ ކަމަށް ކަނޑައަޅާފައިވާ ތިނަދޫ އުތުރު ދާއިރާގެ މެމްބަރ ސައުދުﷲ ހިލްމީ ވިދާޅުވެއްޖެ އެވެ.
ރައްޔިތުންގެ މަޖިލީހުގެ އިދިކޮޅު 12 މެމްބަރުންގެ ގޮނޑި ގެއްލިފައިވާ ކަމަށް އިލެކްޝަންސް ކޮމިޝަނުން ކަނޑައަޅާފައިވާ މައްސަލައިގެ ކަންބޮޑުވުންތައް ސުޕްރީމްކޯޓާ ހިއްސާކުރުމަށް ސުޕްރީމް ކޯޓަށް ވަޑައިގަތުމަށްފަހު ނޫސްވެރިނަށް މައުލޫމާތު ދެއްވަމުން ސައުދުﷲ ވިދާޅުވީ ތިނަދޫ އަކީ އާބާދީ ބޮޑު ރަށެށް ކަމަށާއި، އެ ބޮޑު އާބާދީގެ އަޑު ރައްޔިތުންގެ މަޖްލިސް ތެރެއިން ކަނޑުވައިލާފައިވާ ކަމަށެވެ.
”މިފަހަރުވެސް ތިނަދޫ ހޮސްޕިިޓަލްގައި ކަންތައްތަކެއް ހިނގި، މިކަހަލަ ކަންތައްތަކުގައިވެސް އަޅުގަނޑުމެނަކަށް ނެތް މިނިިސްޓަރުންވެސް ކަމާބެހޭ މުއަސަސާތައްވެސް ޖާވާދަރީ ކުރެވޭކަށް“ ސައުދުﷲ ވިދާޅުވިއެވެ.
ސައުދުﷲ ވިދާޅުވީ މިއީ ވަރަށް ބޮޑު ކަންބޮޑުވުމެއްކަމަށާއި މެމްބަރުކަމުގެ ގޮޑި ބަޔަކު ގެއްލިއްޖެކަމަށް ކަނޑައެޅި ކަމުގައިވިޔަސް ރައްޔިތުންގެ މަޖްލިސް މެމްބަރުންގެ ގޮނޑި ގެއްލޭނެ ގޮތް ޤާނޫނުގައި ވަރަށް ސަރީހަކޮށް ބަޔާންކޮށްފައިވާ ކަމަށެވެ. އަދި ސުޕްރީމް ކޯޓަށް ވަޑައިގެންނެވީ މިހާރު އޮތް ހާލަތުން މިކަމަށް ހައްލެއް ގެނެވޭނީ ސުޕްރީމް ކޯޓަށް ކަމަށް ވަތީކަމަށެވެ.
އިލެކަޝަަން ކޮމިޝަނުން ރައްޔިތުންގެ މަޖްލިސްގެ 12 މެމްބަރުންގެ ގޮނޑި ގެއްލިއްޖެކަމަށް ކަޑައަޅާފައިވާއިރު އޭގެތެރޭގައި ތިނަދޫ ތަމްސީލް ކުރާ 2 ދާއިރާގެ މެމްބަރުންވެސް ހިމެނެއެވެ. އެއީ ތިނަދޫ ދެކުނު ދާއިރާގެ މެމްބަރު އަބްދުﷲ އަހްމަދު (އަބުޅޯ) އަދި ތިނަދޫ އުތުރު ދައިރާގެ މެމްބަރ ސައުދުﷲ ހިލްމީއެވެ.
