ގދ. މާވަރުލު ޑޮމެސްޓިކް އެއާޕޯޓްގެ ރަންވޭ އާއި ޓެކްސީވޭ އަދި އޭޕްރަން ހަދައިދޭނެ ބަޔަކު ހޯދަން އިޢުލާން ކޮށްފި އެވެ.
ފިނޭންސް މިނިސްޓްރީން މިއަދު ކުރި އިޢުލާންގައި ބުނެފައި ވަނީ ގދ.މާވަރުލު އެއާޕޯޓުގެ މަސައްކަތްތަކުގައި ބައިވެރިވާ ކުންފުނިތަކުން ޕްރޮޖެކްޓްގެ ބިޑް ސެކިއުރިޓީ އާއި ޕާފޯމަންސް ސެކިއުރިޓީގެ ގޮތުގައި ކޮންޓްރެކްޓް އަގުގެ ފަސް ޕަސެންޓް ހުށަހަޅަން ޖެހޭނެ ކަމަށެވެ. އަދި އެޑްވާންސް ޕޭމަންޓްގެ ގޮތުގައި ކޮންޓްރެކްޓް އަގުގެ ދިހަ ޕަސެންޓް ލިބޭނެ ކަމަށް ވެސް ފިނޭންސް މިނިސްޓްރީން ބުންޏެވެ.
މި ޕްރޮޖެކްޓުގެ ޕްރީ ބިޑް ބައްދަލުވުން އަންނަ ބުރާސްފަތި ދުވަހު 11 ޖަހާއިރު އޮންނާނެ އަދި ޕްރޮޖެކްޓަށް ހުށަހަޅާ ބިޑް ހުޅުވުން މި މަހުގެ 15 ދުވަހު އޮންނާނެ އިޢުލާންގައި ބުނެފައިވެ އެވެ.
ދީފައިވާ މުއްދަތައް އެއާޕޯޓު ނިންމާފައިނުވާތީ ސަރުކާރުން ވަނީ މާވާރުލު އެއާޕޯޓުގެ މަސައްކަތް މީގެ ކުރިން ހަވާލުކޮށްފައިވާ މޫވިން އިންޓަނޭޝަނަލް ގެ މަސައްކަތް ހުއްޓުވައި، އެއްބަސްވުން ބާތިލް ކޮށްފަ އެވެ.
