ހަސަން ނަޖީީބު ކްރިމިނަލް ކޯޓުގެ ފަނޑިޔާރަކަށް!

ގއ.ޖުޑިޝަލް ދާއިރާގެ އިސް މެޖިސްޓްރޭޓަކަށް ހުންނެވި ގއ.ވިލިނގިލީ ފުރެޝް، އަލްޢުސްތާޛު ހަސަން ނަޖީބު ކުރިމިނަލް ކޯޓުގެ ފަނޑިޔާރުކަމުގެ ހުވާ ކުރައްވައިފި އެވެ.

ސުޕްރީމް ކޯޓުގައި ރޭ ބޭއްވި ރަސްމިއްޔާތުގައި، ފަނޑިޔާރުކަމަށް އައްޔަން ކުރެއްވި ކުރިމިނަލް ކޯޓުގެ 2 ފަނޑިޔާރުން އަދި ސިވިލް ކޯޓަގެ 2 ފަނޑިޔާރުން ވަނީ މަޤާމުގެ ހުވާ ކުރައްވައިފަ އެވެ. ހަސަން ނަޖީބް ގެ އިތުރުން ކްރިމިނަލް ކޯޓުގެ ފަނޑިޔާރުކަމުގެ ހުވާ ކުރެއްވީ ވ.ފެލިދޫ ވިނަރެސް، އިސްމާއިލް ރަޝީދެވެ.

ސިވިލް ކޯޓުގެ ފަނޑިޔާރުކަމުގެ ހުވާ ކުރެއްވީ ގދ.ފަރެސްމާތޮޑާ، މުޝްތަރީގޭ ހަފިޒާ އަބްދުއްސައްތާރާއި ވަޒީފާއާ ބެހޭ ޓްރައިބިއުނަލްގެ ރައީސް ކަމުގައި ހުންނެވި ހުސައިން ފާއިޒު ރަޝާދު އެވެ.

4 ބޭފުޅުންނަށް ފަނޑިޔާރު ކަމުގެ ހުވާލައި ދެއްވީ ހައި ކޯޓުގެ ފަނޑިޔާރު އަބްދުލްޣަނީ މުހައްމަދެވެ. މަގާމުގެ ފަތްކޮޅު އެ ބޭފުޅުންނަށް އެރުއްވީ ސުޕްރީމް ކޯޓުގެ ފަނޑިޔާރު އާދަމް މުހައްމަދު އަބްދުﷲ އެވެ.

ކްރިމިނަލް ކޯޓާއި ސިވިލް ކޯޓުގެ ފަނޑިޔާރު ކަމަށް ޖުޑިޝަލް ސާވިސް ކޮމިޝަން (ޖޭއެސްސީ) އިން ހުޅުވާލުމުން 28 ބޭފުޅަކު އެ މަގާމުތަކަށް ކުރިމަތިލި އެވެ. އެއިން ކޮންމެ ކޯޓަކަށް ދެ ފަނޑިޔާރުން އައްޔަން ކުރަން ޖޭއެސްސީން ނިންމީ މީގެ ހަފްތާއެއްހާ ދުވަސް ކުރިން އެ ކޮމިޝަންގައި ނެގި ސިއްރު ވޯޓަކުންނެވެ.