ހުވަދު އަތޮޅު އުތުރުބުރީ ގއ. ވިލިނގިއްޔަށް އުފަން، މަޝްހޫރު ސްޕޯޓްސް ފިޒިކް، އަޒްނީން ރަޝާދު ރާއްޖެ ފަހުރުވެރި ކާމިޔާބީއެއް ހޯދައިދީފިއެވެ.
އަޒްނީން ރާއްޖެއަށް ރީތި ނަން ހޯދައިދިނީ ދެކުނު ކޮރެއާގައި ކުރިއަށްދާ ވޯލްޑް ބޮޑީބިލްޑިން އެންޑް ފިޒީކް ޗެމްޕިއަންޝިޕުގައި ރާއްޖެއަށް ލޯ މެޑަލް ހޯދައިގެންނެވެ. އޭނާ ލޯ މެޑަލް ހާސިލު ކުރީ ފިރިހެނުންގެ ސްޕޯޓްސް ފިޒީކް 170 ސެންޓިމީޓަރު ބައިންނެވެ. އޭނާއާއެކު 55 ކިލޯގެ ސީނިއާ މެންސް ބޮޑީބިލްޑިން ކެޓަގަރީން މުހައްމަދު މޫސާ ވެސް ރާއްޖެއަށް ލޯ މެޑަލް ހޯދައިދީފައެވެ.
އުމުރުން 30 އަހަރުގެ އަޒްނީން ވަނީ ނިމިދިޔަ މިސްޓަ މޯލްޑިވްސް މުބާރާތުގެ ސްޕޯޓްސް ފިޒިކް 120 ސެންޓިމީޓާ ކެޓަގަރީން ޓައިޓަލް ހޯދާފައެވެ.
