އެންމެ މަތީ ކޯޓަށް، ހުވަދޫ ދަރިއެއް

ސުޕްރީމް ކޯޓުގެ ފަނޑިޔާރު ކަމަށް އައްޔަން ކުރެއްވި އެންމެ ޒުވާން ފަނޑިޔާރަކަށް ގދ.މަޑަވެލި، މޭނާ، އަލްއުސްތާޛު މަޙާޒު ޢަލީ ޒާހިރު ވެވަޑައިގެންފިއެވެ. މަހާޒަށް ފަހު، ސުޕްރީމް ކޯޓުގައި އެންމެ ޒުވާން ފަނޑިޔާރަކަށް ދެން އިންނެވީ ޑރ. އަޒްމިރާލްދާ ޒާހިރެވެ. ބައިނަލް އަޤްވާމީ ފިކުރީ މުދަލާއި ބެހޭ ޤާނޫނުގެ ދާއިރާއިން ޕީ.އެޗް.ޑީ ޑިގްރީ ޙާޞިލުކުރައްވާފައިވާ އަޒްމިރާލްދާގެ އުމުރަކީ 40 އަހަރެވެ.

އުމުރުން 35 އަހަރުގެ މަހާޒު ސުޕްރީމް ކޯޓުގެ ފަނޑިޔާރުގެ މަގާމަށް ރައީސުލްޖުމްހޫރިއްޔާ އައްޔަން ކުރެއްވީ މި މަހުގެ ހަތަރު ވަނަ ދުވަހުއެވެ. މިދިޔަ މަހުގެ 30 ވަނަ ދުވަހު އޭނާގެ ނަންފުޅަށް މަޖިލީހުން ރުހުން ދީފައި ވަނީ ވޯޓުގައި ބައިވެރިވެވަޑައިގެންނެވި 55 މެމްބަރުންގެ އިއްތިފާގުންނެވެ. 

ވަޒީފާގައި އާންމު ގޮތެއްގައި ކޮށްފައިވާ މަސައްކަތްތައް

ބަންޑާރަ ނައިބުގެ އޮފީސް:

ބަންޑާރަ ނައިބުގެ އޮފީހުގައި މަސައްކަތް ކޮށްފައި ވަނީ ޖިނާއީ މައްސަލަތަކާ ބެހޭ ސެކްޝަނުގައެވެ. މައިގަނޑު ގޮތެއްގައި ވަޒީފާގައި ކުރަންޖެހޭ މަސައްކަތަކީ އެ އޮފީހަށް އަންނަ ޖިނާއީ މައްސަލަތައް ހަވާލު ކުރުމުން އެ މައްސަލަތަކުގައި ދައުވާ ކުރެވޭނެކަން ނުވަތަ ނޫންކަން ކަނޑައެޅުމާއި ދައުވާ ކުރެވޭނަމަ ކުރެވޭނެ ދައުވާ ޑްރާފްޓް ކުރުމާއި ޖިނާއީ މައްސަލަތަކުގައި ކޯޓުތަކުގައި ވަކާލާތު ކުރުމެވެ. މީގެ އިތުރުން މައްސަލަތަކާ ގުޅިގެން އެކި ފަރާތްތަކުން ފޮނުވާ ސިޓީތަކަށް ޖަވާބު ދިނުމާއި ބަންޑާރަ ނައިބު ހަވާލު ކުރައްވާ އެހެނިހެން ޤާނޫނީ މަސައްކަތައް ހިމެނެއެވެ.

ޕްރޮސެކިއުޓަރ ޖެނަރަލްގެ އޮފީސް:

2008 ވަނަ އަހަރުގެ ސެޕްޓެމްބަރު މަހު ޕްރޮސިކިއުޓަރ ޖެނަރަލްގެ އޮފީސް ގާއިމުވުމާއެކު އެ އޮފީހުގައި ޖިނާއީ މައްސަލަތަކާ ގުޅިގެން ކުރަންޖެހޭ އެންމެހައި މަސައްކަތްތައް ކޮށްފައިވެއެވެ. އެ އޮފީހުގައި އުޅުނު ދުވަސްތަކުގައި ރާއްޖޭގެ ހުރިހާ މަރުހަލާތަކުގެ ކޯޓުތަކުގައި ދައުލަތުގެ ވަކީލެއްގެ ހައިސިއްޔަތުން ވަކާލާތުކޮށްފައިވެއެވެ. އަދި އެ އޮފީހުގައި އެންމެ ފުރަތަމަ އެކުލަވާލެވުނު ޕްރޮސިކިއުޝަން ގައިޑްލައިން ޑްރާފްޓް ކުރުމާއި ޖިނާއީ މައްސަލަތަކާ ގުޅުންހުރި ޤާނޫނުތައް އެކުލަވާލުމުގައި އެހީތެރިވުންފަދަ މުހިއްމު މަސައްކަތްތައް ކޮށްފައިވެއެވެ.

ޑްރަގް ކޯޓުގައި ބަލާފައިވާ މައްސަލަތަކުގެ މައުލޫމާތު:

އިންޑިކޭޓީވް އެސެސްމަންޓް ހެދުމަށް ނޭޝަނަލް ޑްރަގް އެޖެންސީގެ މައްޗަށް 1293 މައްސަލާގައި އަމަރުކޮށްފައިވެއެވެ. އަދި ފުރަހަމަ ހުކުމާއި ރީހެބިލިޓެޝަނަށް 1145 މައްސަލާގައި އަމަރުކޮށްފައިވެއެވެ. ފަރުވާ ފުރިހަމަ ކުރުމުން، ފަހު ހުކުމްގެ ގޮތުގައި 487 މައްސަލާގައި ހުކުމްކޮށްފައިވެއެވެ. ފަރުވާ ފުރިހަމަ ނުކުރުމުގެ ސަބަބުން ފުރަތަމަ ހުކުމް ތަންފީޒު ކުރުމަށް 257 މައްސަލާގައި މަހާޒު އަމުރުކޮށްފައިވެއެވެ.