ވޯލްޑް ބޮޑީބިލްޑިން އެންޑް ފިޒީކް ޗެމްޕިއަންޝިޕުން ރާއްޖެއަށް ލޯ މެޑަލް ހޯދައި، ރައީސުލްޖުމްހޫރިއްޔާގެ ހާއްސަ އިނާމު ވެސް ހާސިލުކުރި އަޒުނީން ރަޝާދު އޭނާގެ އުފަން ރަށް، ގއ. ވިލިނގިއްޔަށް އައުމުން، ރަށުގެ ރައްޔިތުން އަޒުނީނަށް ހޫނު މަރުހަބާއެއް ކިޔައިފިއެވެ.
އަޒްނީންގެ އުފަން ރަށް، ވިލިނގިއްޔަށް މިރޭ އޭނާ އައުމުން، ރަށުގެ ރައްޔިތުން ވަނީ ރަށުގެ ބަނދަރު ސަރަހައްދަށް ޖަމާވެ، ހޫނު މަރުހަބާއެއް ކިޔައިފައެވެ. ވިލިނގިއްޔަށް އެންމެ ފުރަތަމަ އޭނާ ފޭބުމާ އެކު ތުއްތު ކުދިންތަކެއް ވަނީ އޭނާގެ ކަރުގައި މާފަތިތައް އަޅުވާފައެވެ. ރަށުން އެންމެ ފުރަތަމަ ވެސް އަޒްނީންއަށް މަރުހަބާކީ އޭނާގެ ބައްޕައެވެ. އެއަށްފަހު ވިލިނގިލީ ދާއިރާގެ މެމްބަރު ސައުދު ހުސައިންނާއި ވިލިނގިލީ ކައުންސިލްގެ ބައެއް މެމްބަރުން ވެސް އޭނާއާ ސަލާމްކޮށް، ހޯދި ކާމިޔާބީއަށް ހިތްވަރު ދެއްވިއެވެ.
އަޒްނީނަށް ވިލިނގިން ހޫނު މަރުހަބާއެއް ކިއުމުގެ ހަރަކާތް އިންތިޒާމުކޮށް، ކުރިއަށް ގެންދިޔައީ މޭރީ ސްޕޯޓްސް ކްލަބުން އިސްނަގައިގެންނެވެ. އޭނާއަށް މަރުހަބާ ކިއުމަށް ސަގާފީ ހަރަކާތް ކުރިއަށް ގެންދިޔައީ ބައިރޯހާ ބޮޑުބެރު ގްރޫޕުންނެވެ.
އަޒުނީނަށް ވިލިނގިލިން ހޫނު މަރުހަބާއެއް ކިޔާފައި ވަނީ ދެކުނު ކޮރެއާގައި ބޭއްވި ވޯލްޑް ބޮޑީބިލްޑިން އެންޑް ފިޒީކް ޗެމްޕިއަންޝިޕުގައި ރާއްޖެއަށް ލޯ މެޑަލް ހޯދައިދިނުމުންނާއި މިދިޔަ އަހަރު ނޭޕާލުގައި ބޭއްވި ދެކުނު އޭޝިއާގެ ބޮޑީބިލްޑިން މުބާރާތުން ރަންމެޑަލް ހޯދައި، ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ހާއްސަ އިނާމު ހާސިލުކޮށްފައިވާތީއެވެ.
