ގއ. ވިލިނގިލީ ފެނަކަ ބްރާންޗުގެ މުވައްޒަފަކު ކަރަންޓުގައި ޖެހި، ހިތާމަވެރި ހާދިސާއެއް އަނެއްކާވެސް އެ ރަށުގައި ހިނގައިފިއެވެ.
ވިލިނގިލީގައި ހިއްކި ބިމުގައި އަޅާފައިވާ ހައުސިން ޔުނިޓްތަކަށް ކަރަންޓް ދިނުމުގެ މަސައްކަތުގައި އުޅެނިކޮށް، ކަރަންޓް ޖެހި ހާލު ދަރަވެފައި ވަނީ ގއ. ވިލިނގިލި ފެހިވިލާގެ، އަހްމަދު މުފީދުއެވެ. ވިލިނގިލީގައި ހުންނަ އަތޮޅު ހޮސްޕިޓަލާއި ފެނަކައިން ބުނަނީ އޭނާގެ ހާލު ރަނގަޅުވަމުން އަންނަ ކަމަށެވެ. ނަމަވެސް އާއިލާއިން ބުނަނީ އޭނާގެ ހާލު މުޅިން ރަނގަޅު ނޫން ކަމަށެވެ.
މީގެ ހަތަރު އަހަރު ކުރިން 2015 ވަނަ އަހަރު ވެސް ފެނަކައިގެ މުވައްޒަފަކު ކަރަންޓުގައި ޖެހިގެން ވަނީ މަރުވެފައެވެ. އެ ހާދިސާ ދިމާވީ ސަލާމަތީ ގޮތުން ފުރިހަމަ ކުރަންޖެހޭ އާލާތްތައް އޭނާއަށް ދީފައި ނެތުމުން ކަމަށް އެ ޒުވާނާގެ އާއިލާއިން އެފަހަރު ބުންޏެވެ.
ވިލިނގިލީގައި މިއަދު ހިނގި ހާދިސާގައި އަހުމަދު މުފީދު ކަރަންޓުގައި ޖެހުނީ ނަރުދަމާގެ މަސައްކަތަށް ކޮނެފައި ހުރި ކޯރުތަކުގެ ތެރެއަށް އެރި އުޅެނިކޮށެވެ.
