ސަރުކާރުން އަލަށް ރިސޯޓު ހަދަން ނިންމި ރަށްތަކުގެ ލިސްޓުގައި ހުވަދު އަތޮޅު އުތުރު ބުރީ (ގއ)ގެ ދެ ރަށް ހިމެނާފައިވާތީ، ގއ. އަތޮޅު ކައުންސިލުން އެކަމަށް މަރުހަބާ ކިޔައިފިއެވެ.
ގއ. އަތޮޅު ކައުންސިލްގެ ރައީސް އަހުމަދު ފުއާދު ސޮއި ކުރައްވައި ނެރުއްވި ނޫސްބަޔާނުގައި ބުނެފައި ރިޔާސީ އިންތިހާބުގައި ރައީސް ސޯލިހު އެ އަތޮޅުގެ ރައްޔިތުންނަށް ވެވަޑައިގެންނެވި އެންމެ ބޮޑު ވައުދަކީ އެ އަތޮޅުގެ އިތުރު ރަށްތައް ރިސޯޓު ހަދަން ހުޅުވާލައްވާނެ ކަމުގެ ވައުދު ކަމަށެވެ. އެގޮތުން ގއ. މާރެހާ އާއި ގއ. ހުނަދޫވިލިގިއްލި އަލަށް ރިސޯޓު ހަދާ ލިސްޓުގައި ސަރުކާރުން ހިމެނުއްވުމަކީ ރައީސްގެ ވައުދު ފުއްދެވުމަށް އެޅުއްވި މުހިއްމު ފިޔަވަޅެއް ކަމަށް އަތޮޅު ކައުންސިލުން ދެކޭ ކަމަށެވެ.
ރައީސްގެ އެ ނިންމެވުމާ ގުޅިގެން އަތޮޅުގެ ރައްޔިތުންގެ ނަމުގައި ރައީސަށް މަރުހަބާ ދަންނަވައި، ޓޫރިޒަމް މިނިސްޓަރު އަލީ ވަހީދަށް ޝުކުރު އަދާކޮށްފައިވެއެވެ.
ގއ. އަތޮޅުގައި ފަސް ރިސޯޓު އޮވެއެވެ. އަލަށް ރިސޯޓު ތަރައްގީ ކުރުމަށް 19 ރަށެއް އެކި ފަރާތްތަކަށް ދޫކޮށްފައިވެއެވެ. މުޅި ހުވަދޫގައި 8 ރިސޯޓު އޮވެއެވެ. ރިސޯޓު ތަރައްގީ ކުރުމަށް ޖުމްލަ 28 ރަށް ދޫކޮށްފައިވެއެވެ.
