ގއ. ކޮނޑޭ އިންޖީނުގޭ އިސް މުވައްޒަފަކު ކުއްލި ގޮތަކަށް ނިޔާވެއްޖެއެވެ.
އިންޖީނުގޭ އެސިސްޓެންޓް މެނޭޖަރު މަގާމު ފުރުވަމުން ގެންދެވި މުހައްމަދު އަބްދުލް ހަކީމް (45އ)، ގއ. ކޮނޑޭ/ ނައިޓްރޯސް (ކޮޕީ) ނިޔާވެފައި އޮއްވާ ފެނިފައި ވަނީ މިއަދު ހެނދުނުގެ ވަގުތެއްގައެވެ.
އެ ރަށުން ވާހަކަ ދެއްކި މީހުން “ހުވަދޫ” އަށް ބުނި ގޮތުގައި އޭނާ ނިޔާވެފައި އޮއްވާ ފެނުނީ ނިދާ ނުހޭލައިގެން ކޮޓަރި ބެލުމުންނެވެ. ފެނުނު އިރު ބޭރުފުށުން އެއްްވެސް ކަހަލަ ގެއްލުމެއް ނެތް ކަމަށެވެ.
މުހައްމަދު ކުއްލ ގޮތަކަށް ނިޔާވ މައްސަލައާ ގުޅިގެން އެ ރަށުގައި ފުލުހުންގެ ފޮރެންސިކް ޓީމެއް ދަނީ ހަރަކާތްތެރިވަމުންނެވެ.
މުހައްމަދަކީ ކޮނޑޭ އިންޖީނުގޭގައި ގިނަ ދުވަސްތަކެއް ވަންދެން މަސައްކަތް ކުރި މީހެކެވެ. އޭނާއަކީ ސިއްހަތު ރަނގަޅު، ހެލިފެލިވެ އުޅޭ މީހެކެވެ. ވަޒީފާއަށް އޭނާ ބަރާބަރަށް ނުކުމެއެވެ. ނަމަވެސް މިއަދު އޭނާ ވަޒީފާއަށް ނުގޮސް، ގިނައިރުވުމުން، ބެލިއިރު އޮތީ ނިޔާވެފައެވެ.
މުހައްމަދަކީ ކޮނޑޭ ކައުންސިލް ރައީސްގެ ބޭބެއެވެ. އޭނާގެ މައްޗަށް ކަށުނަމާދު ކުރުން އޮތީ މިރޭ އިޝާ ނަމަދަށް ފަހުގައެވެ.
