ގއ. ކޫއްޑޫ އެއާޕޯޓަށް މި ސީޒަންގައި ބާރުބޮޑު ކަމަށާއި ސީޒަން ތެރޭގައި ދެ ޖެޓު ވެސް އެއާޕޯޓަށް ޖެއްސި ކަމަށް އެއާޕޯޓް ހިންގާ ކުންފުނިން ބުނެފިއެވެ.
ކޫއްޑޫ އެއާޕޯޓް މެނޭޖަރު ސައުދުﷲ ރަޝީދު “ހުވަދޫ”އަށް މިއަދު ވިދާޅުވީ ކޫއްޑޫ އެއާޕޯޓަށް މި ސީޒަންގައި ބާރުބޮޑުވީ އަތޮޅުގެ ރިސޯޓުތަކަށް އަންނަ ޓޫރިސްޓުން އިތުރުވުމުން ކަމަށެވެ. އެގޮތުން ދުވާލަކު 10 ފްލައިޓް ޖައްސާ ކަމަށާއި ބައެއް ދުވަސް ދުވަހު 13 ފްލައިޓް ވެސް ޖައްސާ ކަމަށް ސައުދުﷲ ވިދާޅުވިއެވެ.
އެނާ ވިދާޅުވީ އާންމުކޮށް އެއާޕޯޓަށް ދަތުރުކުރަނީ މޯލްޑިވިއަންއާއި މަންތާއިން ކަމަށާއި ޗާޓަރު ކުރާ ފްލައިމީގެ ފްލައިޓުތައް ވެސް ޖައްސާ ކަމަށެވެ. މި ސީޒަންގައި މިހާތަނަށް ދެ ޖެޓު އެއާޕޯޓަށް ޖެއްސި ކަމަށް ވެސް އޭނާ ވިދާޅުވިއެވެ.
ކޫއްޑޫ އެއާޕޯޓް ހިންގަނީ ސިންގަޕޫރުގެ ކިއޮން ހޮންގު ކޮންސްޓްރަކްޝަން އާއި ރާއްޖޭގެ ހޮޓެލްސް ރިސޯޓްސް ކޮންސްޓްރަކްޝަން ގުޅިގެން އުފައްދާފައިވާ ޕްރިންސްޓައިން އައިލެންޑް އިންވެސްޓްމަންޓް މޯލްޑިވްސްއިންނެވެ.
ގއ. އަތޮޅުގައި މިހާރު ހަ ރިސޯޓް ހިންގައެވެ. ގދ. އަތޮޅުގައި ތިން ރިސޯޓް ހިންގައެވެ. މުޅި ހުވަދޫގައި ނުވަ ރިސޯޓު ހިންގައެވެ.
